Messi na wachezaji wenzake 25 wagomea kuongea na wanahabari Argentina

    

Wachezaji wa timu ya taifa ya Argentina wamegomea kuongea na wanahabari wakiongozwa na nahodha wa timu hiyo Lionel Messi amewaongoza wachezaji wenzake kususia kuongea na wanahabari baada ya ukosoaji kuhusu uchezaji duni wa timu hiyo.

Messi, 29, alitangaza mgomo huo baada yake kufunga bao wakati wa ushindi wao wa 3-0 mechi ya kufuzu kwa Kombe la Dunia dhidi ya Colombia.

Kituo kimoja cha redio kilikuwa kimeripoti kuwa mshambuliaji Ezequiel Lavezzi alivuta bangi baada ya kipindi cha mazoezi, tuhuma ambazo amekanusha.

“Tumepata tuhuma nyingi, kukosewa heshina na hatujasema lolote,” messi alisema.
Messi na wenzake 25 waliondoka kutoka kwenye kikao na wanahabari bila kuzungumza nao baada ya mechi hiyo dhidi ya Colombia.

Taarifa zinasema Lavezzi atakishtaki kituo hicho cha redio.

“Tunajua wengi wenu ambao hamna heshima kwa mchezo huu, lakini kuingilia maisha ya kibinafsi ya mtu mmezidi,” Messi aliongeza.
Argentina walikosolea sana baada yao kulazwa 3-0 na Brazil lakini ushindi wao dhidi ya Colombia umewawezesha kupaa hadi nambari tano na kwenye nafasi za kushindania kufuzu kwa Kombe la Dunia.

Mataifa manne yanayomaliza juu kanda ya Amerika Kusini hufuzu moja kwa moja. Nambari tano hukutana na mpinzani kutoka bara jingine kuamua mshindi.